किरात पुमा राईहरूको तथ्याङ्‌क सङ्‌कलन गर्न आवश्यक

फोटो फिचर लेख-दृष्टिकोण
  • बिनोद पुमा राई ।

वि.सं. २०६८ को जनगणनाको तथ्याङ्‌कअनुसार पुमाहरूको कुल जनसङ्ख्या ६,६८६ रहेको पाइन्छ । अबको जनगणना २०७८ मा धेरै हुनेछ भन्ने आशा छ । पहिलाको जनगणनामा पुमा राई नलेखेर राई अथवा पाछाहरू मात्र लेखेर थोरै जनसङ्‌ख्या देखिएको  हुनसक्छ । अर्को कुरा १० बर्ष भित्र केही न केही बढेको पनि हुन्छ। अबको जनगणनामा नभुल्नु पर्ने कुरा पुमा राई जसरी पनि लेख्नु पर्दछ भन्ने लाग्छ । पुमा एउटा राई भित्रको भाषिक थरी हो र यो हाम्रो पहिचान पनि हो ।

हामी किरात पुमा राईहरू कहाँ के पेशामा छौं ? या कुन क्षेत्रसँग सम्बन्धित छौं ? र कुन स्तरको  दर्जामा कार्यरत छौं- कार्यकारी पदहरूमा छौं या त सामान्य ? शिक्षक, नेपाली सेना, नेपाल प्रहरी, विदेशी सेना तथा प्रहरी, नर्स, डाक्टर, ईन्जिनियर, पाइलट, व्यवसाय, राजनीतिज्ञ, वकिल, अधिकृत, कलाकार, किसान, कृषि, मुन्दुमी धामीहरूलगायत अन्य सबै क्षेत्रमा रहेको सबैको तथ्याङ्‌क संकलन गर्न आवश्यक छ ।

विदेशमा रहेकाहरूको लागि जुनजुन देशमा संस्थाहरू गठन भएको छ । त्यो देशको कार्यसमितिसंग सम्पर्क गरेर त्यहाँको सबै तथ्यांक माग्ने अनि जुन देशमा संस्था गठन गरेको छैन त्यो देशको कुनै एक व्याक्तिसंग सम्पर्क गरेर माग्नु पर्ने हुन्छ । यसो गर्दा हाम्रो जनसंख्या लगभग सही संकलन हुन्छ र  हाम्रो पुमा राईहरू कुनकुन ठाउँमा बसोबास गर्दा रहेछन् कुन देशमा कति रहेछ्न् के गर्दैछन भन्ने सबै अवस्था थाहा हुनेछ |

यसको अलावा यो हाम्रो लागि महत्वपूर्ण दस्तावेज हुन जान्छ र पुमा राईहरूले कस्तो मार्गचित्र बनाउने भन्ने योजना बनाउन सहज हुन्छ । यसका साथै आउँदा पुस्ताहरूले उनीहरूको पृष्ठभूमि थाहा पाई उपयुक्त मार्गचित्र बनाई अग्रगामी कदम चाल्न सहज बनाउनेछ । यसलाई हाम्रो अर्धवार्षिक पत्रिका बुङवाफोपमार्फत प्रकाशन गर्नुपर्दछ ।र यो तथ्याङ्‌क हरेक बर्ष अद्यावधिक गर्दै लानुपर्छ । यसो गर्दा बुङवाफोप समेत एउटा महत्वपूर्ण दस्ताबेजको रूपमा परिणत भई यसकै महत्वमा उच्चता आउनेछ ।

जनसङ्ख्याको जानकारी मात्र नभएर किरात पुमा राई परिवारको समग्र तथ्याङ्क संकलन पनि हुनेछ । यसले पुमा राई समुदायका हरेक परिवार र व्यक्तिबीच निकटता ल्याउनेछ । त्यसकारण किरात पुमा राईहरूको तथ्याङ्क संकलन गर्नु जरूरी छ | किरात पुमा राईहरूको मातृसंस्था किरात पुमा राई तुप्खाबाङ्‌खालाद्वारा https://pumarai.org वेबसाइई सञ्चालन गरिरहेको सर्वविदितै छ । यस वेबसाइटले अनलाइनमार्फत् सम्पूर्ण पुमा राईहरूको तथ्याङ्‌क सङ्‌कलन गर्नका लागि अनलाइन तथ्याङ्‌क सङ्‌कलन फाराम निर्माण गरिसकेको तथ्य बुझिएको छ । धेरै जसो पुमा राईहरू डिजिटल प्रणालीमा जोडिएको अवस्था भएकोले सोमार्फत पनि तथ्याङ्‌क सङ्‌कलन गर्न सकिने देखिन्छ । यसका लागि किरात पुमा राई तुप्खाबाङ्‌खालाले तदारुकताका साथ निर्णय गरी सो अनलाइन तथ्याङ्‌क सङ्‌कलन फाराम लाइभ गर्नुपर्ने देखिन्छ ।

अन्तमा, सबै पुमा समुदाय सामाजिक सन्जालमा जोडिएर एकीकृत हुन आवश्यकता छ । वर्तमान अवस्थामा समाचारलगायत विश्वका दैनिक गतिविधिहरू सजिलो र छिटो थाहा पाउने माध्यम नै सामाजिक सन्जाल हो । हामी पुमाहरूको दैनिक गतिविधि तथा महत्वपूर्ण क्रियाकलापहरू एकआपसमा शेयर गर्नु पुमा समुदायको एकताको लागि समेत अति आवश्यक छ । त्यसैले पुमा राईहरूको आधिकारिक वेबसाइटद्वारा सञ्चालित pumarai.org Official Group सर्च गरेर यो ग्रुपमा सबै पुमा समुदाय जोडिएर अग्रगामी कदम बढाउने समय आइसकेको छ।

 

जवाफ लेख्नुहोस्

तपाईंको ईमेल ठेगाना प्रकाशित हुने छैन । आवश्यक ठाउँमा * चिन्ह लगाइएको छ